Ola!
Estamos de volta para anunciarvos que o pasado xoves, 30 de abril, entrevistamos a diferentes membros do noso concello: ó señor alcalde, á concelleira Pilar e á educadora social Begoña.
Coa axuda dos profesores redactamos as preguntas para despois facérllelas. Foi unha experiencia moi bonita!
Deixámosvos as entrevistas a continuación:
-Cantos anos levas de alcalde?
-Desde o ano 2007, 14
anos.
-É moi difícil ser
alcalde?
-Depende das
situacións, é difícil selo ao gusto de todos
-Que tarefas fai un
alcalde?
-Nun concello pequeno o
traballo é moi diverso: relacións cos traballadores, dirixir e coordinar o seu
traballo; relación cos veciños, atender as súas demandas; relacións coas outras
institucións, Deputación, Xunta e Estado; labores diversas e variadas como a
problemática do Concello.
-Tes moito traballo no
Concello?
-Sempre hai traballo,
se se quere
-Que trasnada fixeches
de pequeno?
-Uf!, supoño que faría
algunhas, pero non recordo moitas. Acórdome dunha especialmente significativa,
cando volvía do colexio da Ponte Carreira, ao baixar do autobús, un neno que ía
no asento de atrás fíxome unha burla e eu respondín tirando unha pedra ao
autobús. As ganancias diso foron máis ben pequenas, tiven un bo castigo.
-Cando eras pequeno,
pensabas ser alcalde?
-A verdade, coido que
non. Ao igual que vós podedes ver a política con certa indiferenza, eu non
pensaba ser alcalde. Un alcalde xurde cando se dan certas circunstancias que
levan a selo. Un non nace para ser alcalde.
-Que serías se non
foses alcalde?
-Traballaría de técnico
industrial na empresa na que traballaba. O día que deixe de ser alcalde,
seguirei a facelo.
- Gustaríache ser
alcalde toda a vida?
-Ser alcalde toda a
vida, non. A política ten que ser unha etapa transitoria. Antes debe haber unha
experiencia laboral. Non se debe eternizar. O que está claro é que os cargos
vitalicios en democracia non deben existir.
-Cal é a cousa que máis
che custa facer sendo alcalde?
-A cousa que máis
difícil resulta é non poder arranxar un problema. Cando alguén expón unha
necesidade ou problema e non poder resolvelo. A máis gratificante solucionar un
problema a alguén, mellorar a súa vida.
-Que é o que menos che
gusta de ser alcalde?
-A impotencia de non
poder abordar todos os problemas, non poder atallar todas as necesidades do
pobo. Moitas veces, aínda facendo o mellor posible, non se pode satisfacer aos
veciños e un é criticado
-Que che levou a ser
alcalde?
-Porque o anterior non
se volveu a presentar. Eu xa era membro da Corporación e os compañeiros
decidiron que era o idóneo.
-Cales son as decisións
máis difíciles que ten que tomar un alcalde?
-A máis difícil, a de
priorizar. Cando hai moitas necesidades e poucos medios, decidir que cousas se
fan e cales se deixan.
-Inauguraches moitas
cousas?
-Algunha que outra. Non
son alcalde amigo de placas. Aprecio máis un sorriso ou un agradecemento que
unha fría placa que ao final ninguén le. As persoas sería bo que nos recordasen
polos nosos feitos e non polas placas.
-En que aspectos cres
que ten que mellorar Mesía?
-Son moitos os aspectos
nos que poderiamos mellorar: as vías de comunicación, sistemas de
telecomunicacións, mellores medios de transporte coas cidades, mellores
infraestructuras, mellores centros de saúde e mellor equipados. O rural
condiciona. Tratamos de mitigar esas carencias.
-Se che deran o que
quixeras para Mesía, que quererías?
-Íavos poñer a todos
moi ben. Pediría uns bos servizos que fixeran que a xente de Mesía non se
sentira discriminada coa xente que vivira noutros lugares, a nivel sanitario, educativo...
-Cal é o lugar de Mesía
que máis che gusta?
-O lugar que máis me
gusta... son todos. Sobre gustos non hai nada escrito, a beleza vai nos ollos
de quen mira. Seguro que a cada un vos vén á cabeza cousas bonitas das vosas
parroquias. É verdade que hai lugares que teñen máis visitas: a Ruta dos
Muíños, As Brañas da Valga, O Castelo de Mesía... Seguro que hai cousas que
aínda non descubrimos. Temos un concello moi bonito.
-Pensas que o noso
Concello está ben adaptado ás medidas do COVID 19?
-O Concello o único que
transmite son os protocolos de actuación que nos fan chegar. En materia
sanitaria non temos competencias.
-Cres que a crise
mundial do COVID 19 se vai solucionar pronto?
-Gustaríame que todo
rematase pronto. Poder relacionarnos con normalidade e preservar a nosa saúde.
Oxalá todos teñamos moitísima sorte. Formulo un desexo: “oxalá remate o antes
posible”
-Alcalde, que farías
para parar o virus?
-Calquera cousa que eu
puidera aportar non serviría de moito. Científicos de todo o mundo investigan e
vese que paralo non é fácil. Todos temos que seguir unhas recomendacións e
consello nese ámbito. Pedirvos que sexades cautelosos, cumprindo as normas de
sanidade para lograr frear a transmisión e que as vacinas cheguen a todos.
-Podería ser que
chegase a fibra óptica a máis sitios?
-Ese é o noso intento e
desexo, de que chegue ao maior número posible de sitios. A nosa obriga é esa e
nesa labor estamos.
-Que proxectos ten para
o futuro en Mesía?
-Seguir dotando de
servizos básicos e esenciais. Continuar co servizo de auga. Tratar de mellorar as infraestruturas viarias, parques
infantís, instalacións deportivas...En canto a prestacións para os nosos
maiores, se fose posible, acadar unha residencia. Somos un concello pequeno, só
xeramos o 25% de recursos propios, dependemos doutras institucións. Seguiremos
pedindo, pero falar de grandes proxectos non deixa de ser un desexo.
-Se cometiches algún
erro, como o solucionaches?
-Seguro que moitos,
errar é inherente á condición humana. Ben é verdade que de maneira
intencionada, ningún. Erros na xestión, como calquera humano. Tratar de
solucionalos da mellor maneira posible.
-Que che gusta facer no
teu tempo libre?
-Descansar. Algunha
outra afección como a caza, a partida de tute cos amigos, enredar na casa con
labores de xardinería...
-Gustaríache cambiar
algo no Concello?
-Gustaríame que o
Concello mellorase en moitas cousas. Somos un concello normal, con paz social,
con relación de cordialidade. Cambiar todo o que son carencias para melloralas.
Temos un Concello apetecible para vivir.
-Cres que Mesía ten
condicións suficientes para teletraballar?
-Depende do sitio. Hai
sitios onde hai condicións e outros con deficiencia. O desexable é que se
puidera en todo o territorio.
-Cando chegará a fibra
óptica a todas as aldeas?
-A intención é que
chegue a todos os sitios. Dicir unha data é aventurado, pero estamos a
traballar en que chegue a todos os recunchos.
-Cres que con esta
pandemia a xente quere volver ao rural?
-Creo que si. É algo
que se está vendo a diario, xente que está alugando ou comprando vivendas no
rural. Durante o confinamento, sentimos condicionada a nosa vida. Se isto pasou
no rural, con máis espazo para saír a fóra, como pasaría na cidade nun
habitáculo de poucos metros, sen vistas. Isto que acabamos de vivir, vai
motivar un retorno ao rural, para gañar calidade de vida. Vivir no rural é un
privilexio, e, se tiveramos todos os elementos necesarios, xa sería envexable.
-Que lles dirías para
que viñeran vivir a Mesía?
-Mesía é un sitio
bonito, tranquilo, con boa xente. Temos prestacións básicas para desenvolver a
vida de maneira normal. Seguro que ían gozar de moitas cousas que non hai na
cidade.
-Terían oportunidades
de traballo?
-O nivel de paro non é
elevado. Sen ser un concello moi industrializado, temos grandes empresas con
cantidade de traballadores
-Hai posibilidade de
turismo en Mesía?
-Posibilidades de
turismo, se a tendencia é vir ao rural, si. Non hai motivo para que non poida
haber casas de turismo rural, de feito houbo dúas que agora non traballan, pero
pode ser factible que volva a haber.
-Que lugares de
interese hai para visitar?
-Pódense facer as rutas
de sendeirismo. Temos un museo do barro e todo o entorno das Brañas da Valga.
En época de verán, as áreas recreativas. As ruínas do Castelo de Mesía. Temos
sitios merecedores de ser visitados. Calquera se pode perder polas nosas
fragas, como a de Visantoña, catalogada como de “masas frondosas de Galicia”.
-Estás en contra ou a
favor dos eólicos?
-Estou a favor das
enerxías renovables, pero totalmente en contra da instalación de parques
eólicos no noso Concello, xa que condicionaría o modo de vida e a economía
existente no Concello. Hai sitios moitos máis idóneos para iso.
-Hai algún personaxe a
quen se puidera facer un monumento en Mesía?
-Seguro que a historia
de Mesía ten dado personaxes relevantes. Que baremo utilizamos para considerar
a un personaxe merecedor dun monumento? Seguro que hai persoas merecedoras
dunha homenaxe ou recoñecemento.
Queremos deixar aquí o noso agradecemento ao Sr.
Alcalde que se achegase ao noso colexio e se sometese ao noso interrogatorio.
Aquí vos deixamos a proba da entrevista:
Agora, deixámosvos a entrevista a Begoña, a educadora social do concello.
Cando eras nena, xa te querías dedicar a este
traballo?
Non exactamente, de pequena quería se profesora de nenos pequenos.
Cantos anos tiñas cando comezaches a traballar?
Tiña 24 anos.
Tiveches outros traballos antes do que tes agora?
Estaban relacionados con este?
Si. Si, estaba bastante relacionado. Cando comecei foi no concello dando
clases á xente maior, un taller de memoria. Despois, xa comecei no posto que
teño agora.
Es concelleira, traballadora contratada polo
concello, funcionaria ou outra categoría laboral?
Son o que se chama persoal laboral do concello. No concello hai dúas
persoas da política ( o alcalde e unha concelleira), tres funcionarios e o
resto somos persoal laboral.
Por que decidiches dedicarte a este traballo?
Supoño que porque me gusta axudar á xente.
Cantos anos levas neste traballo?
Levo case 15 anos.
En que consiste o teu traballo?
Consiste en axudar á xente dunha forma ou doutra: prestacións económicas,
servizos, asesorar no que a xente o precise...
Paréceche interesante o teu traballo? Por que?
Si, paréceme moi interesante, sendo repetitiva, faise boa labor axudando á
xente, hai necesidades de familias que podemos cubrir.
Gustaríache traballar noutra cousa? En cal? Por que?
Estou moi contenta co meu traballo, pero se tivera que elixir outro
gustaríame ser orientadora nun colexio. É un posto similiar, pero con nenos e
nenas, xa que me gusta moito o contacto cos nenos.
Cantas horas diarias traballas?
No despacho ou domicilios traballo 7 horas diarias. Despois, estou pendente
do móbil practicamente todo o día, por se xurde algunha emerxencia.
Despois de rematar a xornada laboral, levas traballo
para facer na casa?
Entendido traballo en levar papeleo, non, pero teño que estar pendente do
móbil, como xa vos dixen, estou de garda. Ademais, é habitual que pense todo o
día como solucionar os problemas das familias que acoden a nós.
Que é o que máis e o que menos che gusta do teu
traballo?
O que máis me gusta é o permanente contacto coa xente. O que menos me gusta
son os trámites administrativos xa que quitan moito tempo a estar coa xente e
axudala.
Custouche moito adaptarte ao traballo cando
comezaches?
Non, adapteime ben. É certo que a práctica fai que todo sexa máis fácil,
pero non me queixo.
Sufriu cambios o teu traballo co paso dos anos?
Si, cambiou, xa que está ligado ás cousas que ocorren no mundo, tal e como
cambia a sociedade, cambian as súas necesidades. Por exemplo, na crise
económica que vivimos cando vós erades pequenos, as familias víronse con menos
recursos económicos. Agora, coa pandemia do Covid tamén xurdiron cambios.
Cal é a función dentro do teu traballo que resulta
máis difícil realizar?
O máis difícil é tomar a decisión de separar a persoas da súa familia.
As funcións do teu posto de traballo son demasiadas
para realizar ti soa ou dalas feito sen problema?
Necesito axuda. No departamento somos tres persoas, cada unha fai unha
parte do traballo, pero somos necesarias as tres, e non funcionaría sen algunha
delas.
Que etapa da vida das persoas é a que che resulta
máis complicada á hora de traballar? Por que?
Coa xente de mediana idade, porque lles parece que o saben todo e cústalles
moito recoñecer que os adultos tamén nos equivocamos.
É moi cansado o teu traballo? Por que?
Fisicamente non. Mentalmente si é cansado, é un traballo de moito estrés,
porque sempre buscas axudar o antes e mellor posible e ás veces non é posible.
Prefires traballar coas persoas maiores ou con
nenos? Por que?
Gústanme as dúas etapas, porque me parece que a xente desas etapas é a máis
agradecida, sempre consegues cousas boas e coa mediana idade non tanto.
Acariñácheste especialmente con algunha das persoas
ás que atendes?
Si, con moitas, coa maioría. É un trato moi persoal o que manteño coa
xente, sei todo da súa vida, acompáñoos durante moito tempo ... é imposible non acariñarse.
Que traballos realizas cos ou para os nenos e nenas?
Nós traballamos coas familias, non directamente cos nenos e coas nenas, así
axudando á familia, axudamos aos nenos tamén.
En que consiste o teu traballo de cara coas persoas
con algunha discapacidade?
Axudarlles na medida no que a súa discapacidade faga que necesite axuda,
teñen necesidades algo diferentes e nós vemos como cubrir esas necesidades.
Como afectou a crise do Covid ao teu traballo?
Temos máis demanda de traballo en certos aspectos: axudas económicas, axudas
para coidar aos maiores... Por outro lado, cambiou tamén porque hai que evitar
o contacto persoal, así que falamos moito por teléfono, hai menos contacto
físico coas persoas.
Sabes como lle afectou a crise do coronavirus á vida
da veciñanza? Podes dicirnos algún exemplo?
Algunhas familias viron reducidos os ingresos económicos, hai papás e mamás
sen traballo ou no ERTE.
Por outro lado, moita xente maior no noso concello vive soa e, por esta
pandemia, as visitas das súas familias víronse reducidas ou suspendidas.
É difícil traballar coa xente maior (anciáns e anciás)?
Non, nada difícil, en absoluto. En xeral responden moi ben, son moi
agradecidos, son obedientes, gústalles que esteas pendente deles....
Danche pena os maiores que están sós por causa da
pandemia?
Moita, porque o máis importante para eles é a familia e, pola pandemia,
teñen que estar sen gozar dela.
Tiveches que atender a persoas con doenzas mentais?
Como foi a experiencia?
Si. Foi moi interesante. Ademais, teño estudos en psicoloxía, polo que me
encanta esa parcela.
Cal foi o caso máis difícil ao que te enfrontaches
no teu traballo?
Ningún en concreto. O máis difícil é cando existen malos tratos, tanto para
traballar como para asimilar.
Que é unha familia numerosa?
É aquela que ten tres ou máis nenos ou nenas. Despois, existen outros casos
máis concretos, pero ese é o caso xeral.
Que beneficios ten unha familia numerosa?
A familia numerosa pode solicitar unha tarxeta para obter descontos en
moitas cousas relacionadas coa infancia: supermercados, zapaterías, ópticas,
actividades extraescolares ...
Que parcela do teu traballo che gusta máis ? Por
que?
O trato coa xente é o que máis me gusta, falar coa xente e que confíen en
min. Gústame o trato próximo coa xente.
Que son as tarxetas “Benvida”? Cres que as familias
se benefician delas?
Son axudas que proporciona a Xunta de Galicia que consiste en que cando
nace un bebé, a familia poida pagar os gastos do bebé. Duran o primeiro ano de
vida do bebé e obteñen 125€ mensuais, no caso do noso concello.
Estou segura que si que se benefician dela.
Acostumas ir a centros educativos? Esta é a túa
primeira entrevista feita por nenos?
Si, temos que estar en contacto cos centros educativos, pero non na aula,
case sempre falamos coa orientadora, coa directora ou con profesores/as.
Si, esta é a primeira.
Algunha vez competiches con outra persoa para saber
cal era mellor no traballo?
Non, nunca, cada unha do equipo temos unhas funcións complementarias, non
hai competencia.
Cambiarías algo do funcionamento do concello? O que?
Algunhas ao mellor si cambiaría, pero as que cambiaría hai leis que nolo
impiden.
Gustaríame que non houbera tanta burocracia, pero é así por leis que o
regulan, non podemos cambialo.
Gustaríache ser alcaldesa?
Non, porque me parece dificilísimo e non me gusta a política, non podería
dedicarme a algo que non me gusta. E, repito, é moi difícil, se se fai ben.
Que outro posto no concello che gustaría ocupar?
Gústame moito o meu posto, pero se tivera que elixir outro, gustaríame
traballar na Casa da Cultura pola biblioteca que hai, encántanme os libros.
Que che gusta facer no teu tempo libre?
Ler, pasar tempo coa familia, cos nenos, e, se queda tempo, ir de tendas.
Por que aconsellarías aos nenos e ás nenas que
loiten polos seus soños?
Vou responder referíndome a metas relacionadas co traballo e a profesión.
Porque dedicarte ao que che gusta é o máis importante, no eido laboral. No traballo
pasamos moitas horas, é moi importante estar a gusto, é a única forma de
conseguir unha plena felicidade.
Tamén nos gustaría deixar constancia do noso agradecemento a Begoña por prestarse a esta actividade. Ademais, agradecemos a claridade coa que nos explicou as cousas e que respondeu a todas as preguntas que tiñamos preparadas e ás que se nos ocorreron no momento.
Deixamos as fotos da entrevista:
Por último, deixámovos a entrevista que realizamos a Pili. Nesta ocasión publicamos o vídeo e algunhas fotos, xa que aínda somos moi pequenos e pequenas para poder apuntar todo o que nos contou.
Agora van os vídeos:
Ata aquí esta actividade, pero axiña teredes máis noticias de nós.
Agardamos que gocedes do que facemos como nós gozamos ao realialo.
